وازیوستأن ژگران چۊشمه' بپیرا دارˇسر
دۊتته چوشم أن تۊ بنی دار ئکانی هیزارˇسر
ترنی تازه ببو سنگ أجی کمتر خؤ نییی
اۊن أنی سبزی بۊمئه، واشان أجی بهارˇسر
دؤنه ئان دۊتته دس أجی آسۊمان' دؤخؤنن
بزنه راک، سر ئاچئه هیل ؤ کگج، کوارˇسر
ویسک ؤ ویسک أجی گوئه می تاج' بئین عالمی شام
وؤزه وختی بۊنه أجی چیمکه کۊلۊشمائارˇسر
وزرأنه خۊ تنی رختۋره' کؤلک چاکˇدل
چاک بزئه وزگه خؤر' کؤلکˇکردکارˇسر
مۊ نؤدؤنم چی بؤگۊت ملجه زیمی گوشˇدیمه
دۊاج' جللی فیچی نئابؤ میلئم ؤ مارˇسر
کؤکؤئه هرچی خؤنه خۊ دیلی دۋ' در نکونه
بگیتئه یتیمی أجی هنده فنار فنار' سر
زنه خۊ یارˇواسر مچمچ ؤ گرگر زرج ئه
گر ئادئه لیسک ئادهه گراچ أجی تاوارˇسر
ترنی جانانˇهمرا بدی بال به بال بموج
ندی تال فیپیت گول' نویره ننگ ؤ عارˇسر؟
لمˇدل سؤدامˇ همرا هچی آو' پریجه
کۋلی ؤ اسلکˇواز، ریجˇدلان ؤ شارˇسر
هکره دیمˇهمه' اندی ینی بر دره وا
سراکؤ آلاله أجی فامیلˇکؤکنارˇسر
بیه نؤشمأر کاران' فرده بؤشۊ کۊلهت ؤ کۊ
گالشˇجور نویریم مالانی چل ؤ چائارˇسر
مۊ چره دوجه دبؤر هاویرم ؤ واتۋره گؤم
دیر ئابه دئه بؤخؤسم فرده بؤشوم وا کارˇسر